A Vicepresidencia da Deputación de Lugo, a través da área de Artesanía e Deseño, organiza o primeiro ciclo de Concertos Medievais Lugo de Trobas e Cantigas, con catro recitais en emprazamentos simbólicos desta etapa histórica que decorrerán nos vindeiros meses.
A primeira cita será esta cuarta feira na capela de Santa María, en Lugo, cun concerto relatorio centrado nos salterios medievais e a súa recuperación.
A artista Begoña Olavide e o luthier Carlos Paniagua serán os encargados de pór son e historia a este instrumento, con entrada de balde.
Os salterios medievais son instrumentos desaparecidos, esquecidos no tempo e ausentes en museos e coleccións. Este instrumento vese representado nun gran número de esculturas, pinturas e miniaturas de códices en toda Europa, o que dá a entender a súa importancia durante toda a Idade Media.
Olavide e Paniagua achegan así a Lugo os seus coñecementos na recuperación do instrumento, co que presentarán reproducións de salterios construídos no seu taller, ao tempo que explicarán as características e mostrarán os peculiares sons.
