A Fiscalía reclama fechar a causa contra a parella de Sánchez por falta de indicios, tras unha denuncia baseada en acusacións de medios conservadores e de ultradereita

A Fiscalía española confirmou a quinta feira que presentou unha apelación na Audiencia Provincial de Madrid na que reclama arquivar a causa logo da decisión do xuíz Juan Carlos Peinado, titular do Xulgado de Instrución 41 de Madrid, de abrir dilixencias contra a parella do presidente do Goberno, Pedro Sánchez (PSOE), tras unha denuncia da ultradereitista Manos Limpias baseada en publicacións de medios conservadores e de extrema dereita. O Ministerio Público subliña que a querela non achega ningunha clase de indicio que xustifique a apertura dunha causa penal por suposto tráfico de influencias e corrupción nos negocios, polo que insta a revogar o auto asinado o 16 de abril e que transcendeu a cuarta feira, que desembocou nunha carta pública rubricada por Sánchez anunciando a suspensión da súa axenda pública até a próxima segunda feira para avaliar se permanece á fronte do Executivo despois do que cualificou de “operación de acoso” por parte da dereita e o ultraespañolismo. Pedro Sánchez, sobre a súa continuidade á fronte do Goberno español: “Necesito parar e reflexionar” Pola súa parte, Manos Limpias admitiu que a denuncia está baseada nunha “serie de informacións” de diarios dixitais, remarcando que é o xuíz quen debe comprobar se “son certas ou non”. Peinado admitiu a trámite a demanda e abriu dilixencias sen consultar coa Fiscalía, algo non habitual, e xa fora cuestionado por causas contra cargos progresistas por publicacións supostamente ofensivas contra os conservadores, neste caso tamén a raíz dunha denuncia de Manos Limpias, todo isto no marco dun Poder Xudicial controlado polos conservadores por mor do bloqueo do PP á súa renovación, que provocou que leve máis de cinco anos co mandato caducado. Acoso a Quintana Múltiples cargos do PSOE transmitiron a quinta feira o seu apoio a Sánchez e a incerteza sobre a súa decisión final. O titular de Xustiza e Presidencia, Félix Bolaños, sinalou que desexaría que continuase, e a de Ciencia, Innovación e Universidades, Diana Morant, apuntou que “esta batalla non a poden gañar” os que “fan unha guerra sucia para tombar un Goberno lexítimo”. En paralelo, a vicesecretaria xeral do Partido dos Socialistas de Galicia (PSdeG), Lara Méndez, catalogou a determinación de Sánchez como unha “reivindicación en toda regra” da “política do non todo vale”, evocando “os ataques persoais ao vicepresidente [galego entre 2005 e 2009, Anxo] Quintana”, do Bloque Nacionalista Galego, nunha campaña electoral que levou o actual líder estatal do Partido Popular, Alberto Núñez Feixoo, á Xunta. O voceiro de Sumar, Íñigo Errejón, solicitou “construír un amplo bloque democrático” contra a ultradereita e os poderes non electos que condicionan a política estatal, e Feixoo insistiu en que o anuncio de Sánchez é un “espectáculo de adolescentes” e unha tentativa de “gobernar por compaixón”, aseverando que o mandatario non ofreceu explicacións dos supostos casos de corrupción que afectan o seu Goberno, o que reiteraron os seus correlixionarios á cabeza de Andalucía, Juan Manuel Moreno, ou a Galiza, Alfonso Rueda, que destacou que Sánchez está a “victimizarse”. Arquivada a causa contra Mónica Oltra que desencadeou a súa dimisión en 2022 Ao tempo, ningunha das forzas nacionalistas que permitiron a investidura de Sánchez e son determinantes para dar viabilidade ás propostas do Executivo cuestionaron o seu apoio de producirse un cambio de liderado ou unha moción de confianza. A portavoz nacional do BNG e líder da oposición na Galiza, Ana Pontón, detallou que no país “coñecemos moi ben as campañas sucias do PP, así que toda a miña solidariedade co presidente do Goberno no persoal e no emocional”, un aspecto no que fixo énfase o deputado do BNG no Congreso, Néstor Rego, que criticou a “estratexia de crispación sen escrúpulos morais e éticos” dos conservadores, “especialmente do PP”, “especialistas” en atacar os adversarios para “tapar as súas propias miserias e a súa propia corrupción”. A secretaria xeral de Esquerra Republicana de Catalunya (ERC), Marta Rovira, xulgou “tacticista” a decisión de Sánchez após a súa complicidade á hora de “vulnerar os dereitos humanos e debilitar a liberdade” cando se trataba dunha persecución contra as persoas independentistas catalás. Neste sentido, o voceiro de Junts na comisión de Xustiza do Congreso, Josep Maria Cervera, abundou neste punto, lembrando que xa avisaran de que “a fórmula das acusacións falsas e a deshumanización dos nosos líderes políticos e sociais, cando conviñese, tamén se aplicaría a aqueles que entón calaban, alimentaban ou aplaudían”. Ao respecto, o coordinador xeral de EH Bildu, Arnaldo Otegi, estimou que, “cando se compran os marcos á extrema dereita, pasan estas cousas”, salientando que “o sistema xudicial no Estado español é un sistema que utiliza o lawfare [uso da Xustiza para perseguir opoñentes políticos] permanentemente”, o que deriva en que cando calquera grupo ultradereitista presenta unha querela é “preciso só que un xuíz ou xuíza a admita” para que “convertan isto nun escándalo político”. O ex presidente español Mariano Raxoi, implicado na espionaxe ilegal ao independentismo catalán Á vez, o presidente do Partido Nacionalista Vasco (PNV), Andoni Ortuzar, indicou que “a política está a entrar por uns camiños desagradábeis, inxustos”, e alertou do “dano evidente á reputación do sistema político do Estado” por manterse a expectación sobre a resolución final. En última instancia, Ione Belarra, secretaria xeral de Podemos, requiriu ao PSOE “valentía” para acabar co lawfare, recriminando a inacción cando a ofensiva se dirixiu contra os seus cargos. O CIS prevé a vitoria do PSC con ERC e Junts pugnando pola segunda praza A enquisa preelectoral do Centro de Investigacións Sociolóxicas (CIS) español sobre os comicios cataláns do 12 de maio adianta que o Partit dels Socialistes (PSC) repetiría como primeira forza, con ERC e Junts competindo pola segunda posición. Segundo o CIS, Esquerra imporíase en sufraxios e os de Puigdemont en escanos, e sumando a estimación da Candidatura d’Unitat Popular (CUP) non alcanzarían a maioría absoluta nin no rango máis alto da sondaxe. Ademais, Ciudadanos quedaría fóra do Parlament, no que a Vox se podería engadir outra forza de extrema dereita, Aliança Catalana, que se movería entre cero e dous representantes. Estimación de escanos do CIS de cara ás eleccións adiantadas en Catalunya do 12 de maio. (Imaxe: Nós Diario) En todo caso, as entrevistas decorreron antes do anuncio de Sánchez, que marcou o comezo da campaña catalá na medianoite da quinta á sexta feira, algo do que se laiou Marta Rovira (ERC), que acusou o PSC e o seu candidato, Salvador Illa, de fomentar que se fale máis desta cuestión que “do que Catalunya precisa”. Salvador Illa reuniu a quinta feira a Executiva da formación para abordar a situación e o “enlamamento da política” antes do acto previo ao comezo da campaña en Sabadell, no que estaba previsto a presenza de Sánchez. Pola contra, ERC elixiu Barcelona para lanzar a campaña á reelección do presidente catalán, Pere Aragonès, e Junts Argelers, na Catalunya Nord, ao atoparse fóra de Catalunya o seu candidato, o ex mandatario Carles Puigdemont. A capital catalá tamén foi o lugar escollido pola CUP e a extrema dereita de Vox, entrementres, Comuns-Sumar optou por Reus e o PP por estrearse en Castelldefels.